आज एक बाप अपणी बेटी तै हार गया

सारे लाहणे वो पल मै तार गया

आपणी लाडो के चा पुगाणे मन मै मार गया

पैरा मै रुल्गी पगड़ी अर इज्जत तार तार

आज एक बाप अपणी बेटी तै हार गया

आज एक बाप आपणी बेटी तै हार गया

आपणी इज्जत की गेल खुभैत कररया सै

ताऊ सुरता आज पंचैत कररया सै

थ्याई माणसां तै भर री सै

अर खाट भी चर्चा कर री सै

खड्या हो कै एक पंचायती बोल्या

अर पंचायती रोले का राज खोल्या

ताऊ सुरता की छोरी रामफल गेल भाजगी

जिसतै म्हारे सारे गाम की इज्जत लाजगी

पंचैत मै खुसर फुसर चाल पड़ी

सारया की खंडके बंधी नाड़ हाल पड़ी

एक बोल्या फेर इसमे रामफल का के खोट सै

ताड़ी एक हाथ ना बजती दोनुवा की ज़ोट सै

दूसरा बोल्या फेर दोनुवा नै मजा चखा दयो

गाम के रिश्ते के हो सै दोनुवा नै बता दयो

फेर एक और खड्या होलिया

अपणे सिर पै तै तार कै तोलिया

बोल्या दोनुवा नै मारे पाछै कुणसा सुख हो ज्यागा

एकला छोरा सै रामफल माँ बाप नै दुख हो ज्यागा

सुरता बोल्या एकला सै तो मनै के आंट सै

लागै सै छोरे इसमै तेरी भी सांट गांठ सै

छोरा बोल्या ताऊ सांट गांठ तो तेरी छोरी करगी

जो तेरे खंडके नै अर मुछा नै छात पै धरगी

तू जद नी बोल्या जद ओ रामफल यार बणाया

गाम की गाम मै तेरी छोरी नै भरतार बणाया

सुरता का रंग लाल होगया

अर पंचायत मै बवाल होगया

लोग एक दुसरे की आँख्यां मै देख देखकै हाँसै थे

बात बात पै हुंगारे भर भरकै खांसै थे

ताऊ सुरता उनकी हरकता नै खूब पीछानै था

एक एक आदमी की ओकात नै आछी तरियां जानै था

रै ये वाए लोग थे जो कदे उसका झूठा खाया करदे

बोलणा तो दूर की बात कदे नाड़ नी ठाया करदे

आज भरी पंचैत मै इज्जत की बिरान माटी होरी थी

किस तै कहंदा सुरता करण आली खुद की छोरी थी

रै व़ा छोरी जिस के कहणे ओ पल मै पुगाये करदा

गेल रोंदा गेल हासदा अर गेल्याए गाये करदा

मासूम सी दिखण आली छोरी आज सारा कीमे उजाड़गी

बचपन मै मुछां तै खेलण आली आज उननै जड़ तैए पाड़गी

फेर एक छोरा बोल्या ताऊ कयूँ इतना कठ कर रया सै

अर सबर कर ले इसे मै कयूँ गात का मठ कर रया सै

सुरता पंचैत कानी लखाया

पर उसका हिमायती कोए नी पाया

खड्या होकै बोल्या रै क्यूकर सबर कर लयू

इस तै आछा तो कुए मै पड़ कै म़र लयू

रै बियाह तै तीन दिन पहलया जिस की छोरी चली जा सै

उस बाप की पगड़ी सारे बाजार छली जा सै

रै के इसे दिन खातर लोग छोरियां नै चाहवै सै

सयाणे सै वै लोग जो छोरीया नै पेट मै मरवावै सै

जे मै भी आपणी छोरी नै पेट मै मरवा खडदा

तो यू दिन मनै कदे भी नी देखना पड़दा

रै व़ा के छोरी जो अपणे बाप की पगड़ी नै रुलवा दे

अपणे गाम की चोगरदे नै हाँसी करवा दे

ना सूरते न्यू रामफल का बाप बोल्या

अर खंगार कर कै आपणा सुखा गला छोल्या

रै पेट मै मारे तै यो रोला नी झुकया करदा

बाल पाडे तै कदे मुर्दा का वजन नी मुकया करदा

रै गलती आपणी ए सै आप बालका नै नी सीखा पाए

अर सही संस्कारा का उन नै रह नी दिखा पाए

एकला सै तो के होया मै घर मै नी बड़ण द्यूंगा

रामफल अर उस छोरी नै बार नै नी खडण द्यूंगा

सुरता बोल्या रै मेरा इतने मै क्यूकर सर ज्यागा

मनै तो जिब सबर आवै जद तेरा छोरा मर ज्यागा

रै आये बेठे रिश्तेदारा तै मै के मुह दिखाउंगा

जिस दिन थयागे मै दोनुवा नै पाणी पियाउंगा

थयाई मै चोगरदे नै सी सा सुप थी

इस बात पै पूरी पंचैत चुप थी

फेर बोल्या सुन ल्यो ए जे कोए छोरी सुणदी हो

आपणे बाप की रे रे माटी करण के सपने बुणदी हो

जिन्दे जी आपणी खुशिया कै आग ना लायीयो

अर आपणे बाप की पगड़ी कै कदे दाग ना लायीयो

या बड़ बड़ करदा सुरता घर नै चाल पड्या

सुण कै उसकी बात सारया का कालजा हाल पड्या

आगले दिन बखत सारे गाम की हासी खा गया

ताऊ सुरता घरा जांदे रात ए नै फासी खा गया

बेचारा सुरता बस इतने मै ए सार गया

अक आज एक बाप आपणी बेटी तै हार गया

आज कहूं मै लख्मीचंद नै

आज कहूं मै लख्मीचंद नै तू कुणसे पाणी उतर गया

तेरे हरियाणा की संस्कृति कै यो कोण घुन चिमड़ गया

उठ दादा तो भी इब तो कीमे ना कीमे बोल

आज फेर पदमावत का कोए अगला किस्सा खोल

मार निगाह तो भी अर देख तेरा हरियाणा

ना रहे देसी खान पान ना रहा देसी बाणा

दूध दही की सुन कै इब तो हाँसी भी ना आती

मखण मलाई कित थे इब तो लासी भी ना पाती

तेरी पिछाण की तूड़ी हो ली तू भी आ कै देख आज

पिसे अर सुआद की लाग री जणे खणे कै खाज

ना कोए मांगे राम रहया ना कोए धनपत मीर

बींध गड़े नगाड़े तासे मार मार लाम्बे तीर

बीन अलगोजे बांसली इब कित तै ढूंढ़ कै लियावा

धोले खान बरगे चेले तेरे कित तै मूंढ कै लियावा

सांझी आहले रागनी गीत बचे आर ना बचे तेरे सांग

ना पुराणा संगीत बचया तोड़ दी सब कयाहे की टांग

चरखयां की टूटी ताणी अर ग़ल के टूटे गीत

सणे डाहले आज पींग टूटी तेरे सामण की रीत

आज हर कोए गडवा बांध कै खुद नै कलाकार कुहावै सै

अर ये कलजुगी कलाकार तो नीरे झोटे बिकावै सै

या फेर किसी दुसरे की गेल्या रागनी कॉम्पिटीशन रचावैगा

अर उस कॉम्पिटीशन मै नीरी लुगाई अर छोरीया नै नचावैगा

कोए फ़िल्मी गाणा तोड़ मरोड़ कै हरयाणवी मै गावैगा

अर उस गंदे से गाणे नै दादा चट पटी रागनी बतावैगा

ना रागनी का मतलब पता अर ना जानै कीमे राग

संस्कृति अर संगीत कै ला गडी तेल गेड गेड आग

काचा मंदा गा कै नै ये कुछ कहणा चाहवै सै

हंस चूगरे सै दाना चुगा आज काग मोती खावै सै

तेरे बिना या संस्कृति आज अपनी पिछाण खोवै सै

या लहू लुहाण होई दादा तेरे छल्या मै बेठी रोवै सै

आज इसका चोगरदे तै अँधेरा गुप सै

इस बाबत तो दादा बड़े बड़ेरे भी चुप सै

यो बखत तनै बुलावै दादा इतना कहणा पुगा जा

बण मसीहा संस्कृति का एक बार दोबारा आजा

आज हर कोए बण लिया सै रूप रंग का चोर

अर मै कित तै लियाऊं टोह कै लख्मीचंद एक होर

लख्मी चंद एक और दोस्तों लख्मी चंद एक होर

मै किसान का बेटा सूं ........

गरीबी का दोल्डा ओड़ कै मै कई बार लेटया सूं
तंगी मंदी अर दर्द तै मै कई बार फेटया सूं
लोगां नै कमा कै देईए अर खुद पै कुछ नी
आज फख्र करू के रोऊ मै किसान का बेटा सूं ........



गाम कै बीच मै छोटी इंटा का एक छोटा सा घर सै
अर तंगी मंदी दर्द के गेल्या माहरे चार जिया का बसर सै
एक माँ एक बहन अर मेरे बाप का उतरा होया चेहरा सै
नहर का हाला अर बिजली का बिल आज भी ग़ोज में लेहरया सै
आज किसान की असलियत की फोटो थाम नै दिखाऊंगा
अर इस खेती मै के बचै सै यो सारा हिसाब सुनाऊंगा
मेरै आज भी वो दिन याद सै जड़ मंडी मै चाला होरया था
अर सीरी नै छाती कै लाये मेरा बाप भरल भरल रोरया था
एक तरफ तो जय जवान जय किसान के नारे लाये जा रे थे
अर दूसरी तरफ किसान के लत्ते सरेआम उतारे जा रे थे



( और जहा से शुरुआत हुयी )
अम्बर के बदला की बाट देख देख कै सबे कीमे खो लिया था
ज़मीन पै आई पपड़ी नै खुरच कै मेरा बाप आधा पागल हो लिया था
फेर खबर आई तो सारा गाम दुःख में जकड लिया
अक नम्बरदार का गाबरू छोरा रात बिजली नै पकड़ लिया
होणी बरती एक दिन यो भगवन भी हम तै खीजरया था
सप्रे करदा करदा मेरा ताऊ चन्दगी हम तै बिछडया था
सीजन मै हाल यो ए था कोई पानी खातर लड़ मर रया था
कोए रीढ़ आली तुडान खातर कुए के माह पड़ रया था
किसे का बालक पचास पिसे की कुल्फी पै रो रो काटिए काटे था
अर कोई देख मास्टर के बालका के लत्ते आपणे दिल नै डाटे था
मेरै याद सै दिवाली की वा काली रात के वा क्यूकर छाई थी
कर्जे के बोझ मै दबे चांदी नै दोस्तों उस दिन फंसी खाई थी
सरसा शहर मै उस रात दिवाली का जमा दमीड सा बल्या था
अर माहरे गाम गुआंड मै उस रात किसे कै चूल्हा नी जल्या था


अर ओ दिन बी याद सै जद घागर मै उफान था
चोगरदे नै पानी ए पानी सारा कीमे बियाबान था
सारी फसल पानी मै उपरला हिस्सा भी नी छुट रया था
देख बखत की मार माहरे सारे गाम का दम घुट रया था
फसल की चिंता मै ना कोई जागे था अर ना सोवै था
म्हारे गाम का हर आदमी उस टेम कुण मै बढ बढ रोवै था
सरपंच का छोरा अर सीरी पानी मै तिर कै फसल का जाला टाण गए थे
अर इसे गए दोस्तों के मै उरै आ लिया अर वै आज लग उलटे नी आए थे



ले देकै इस विपदा तै भी एक दिन पार पाया
अर पानी उतरे पाछै लोगां की साँस मै साँस आया
लड़ घुल कै किस्मत गेल्या फसल मंडी मै आई थी
रात दिन की मेहनत दोस्तों उस दिन रंग ल्याई थी
फेर इस उपरला नै के कहदे रै रेट नै धरण धरण छन गया
फसल का समुन्दर दिखनिया मिनट मै पानी का जोहड़ बन गया
मंडी मै अफरा तफरी थी कोई तिरपाल अर कोई पन्ना चक रया था
अर सोच कै अपणी अगत सारया का कालजा धक् धक कर रया था
आली होई फसल नै लोग पसीनया गेल्या सुखावै थे
ख़रीदन आले अफसर हाथ मै ठान्दे नाक चड़ावै थे
अर सीधा साधा दिखनिया माणस आज एक उल्टा काम करै था
बुकावे मै आकै सड़क पै लिटकै आज चक्का जाम करै था
रै रोटी सेक्निया माणस आज उरै भी उसती बुकावै था
तंगी मंडी अर दर्द गेल पुलिस की लाठी भी खुवावै था



पन्दरा दिन पाछै बिकी फसल एक और मादी छिड़ कै रहगी रै
सारी साल की कमी उस पैड की सियाही मै लिबड़ कै रहगी रै
आढ़ती की बही पै गूंठा ला कै जिब मेरा बाप घर नै जावै था
कर बेट्या बरगी फसल नै याद उसका कालजा मुह नै आवै था
आज दुनिया के अन्नदाता का यो हाल हो लिया
इस खेती के चक्कर मै मेरा सारा गाम कंगाल हो लिया
अर इब मेरै गेल बणनी या सब कयोंके मै ए छोरा जेठा सूं
अर आज फख्र करू के रोऊ रै मै एक किसान का बेटा सूं
दोस्तों एक अन्नदाता का बेटा सूं
एक किसान का बेटा सूं